再向虎山行是 1982-83年亞洲電視的一個電視劇的名字, 當年這電視劇紅透中港澳, 星馬及美加等地。 虎年到了, 所以記起這個劇集的名字, 當然還有下文, 未講之前, 先同各位拜年, 祝各位不但全年都龍精虎猛, 每日早午晚都要虎虎有威。夜晚都威? 去邊度威呀? 馬場囉, 跑夜為唔駛威咩? 威少一次都唔得呀。拜完年講番個電視劇, 本來劇名叫‵偏向虎山行′的, 但驃叔認為個偏字有抝氣的意思, 就改為再向虎山行, 個人認為有這個劇名有畫龍點睛的味道。
好喇, 開場白講完, 回頭又要講番馬。初五草地日賽, 都幾勢均力敵。特別介紹第三場, 二班1200米這一組, 真可以用好手林立來形容, 包括何華麟隻初出馬「逍遙尖子」外形俊俏, 絕不是弱者。心目中此場頭馬非「夠響夠獎」莫屬, 上次贏馬的輕鬆表現, 真是記憶猶新, 遺憾是換來加分加磅, 由119加到130磅都不怕, 加10分亦是虛實參半, 未必消化不到, 主要睇好的原因是仍在二班原班作賽。雖然話再贏就會升上一班, 這種情況, 在一些攻心計的馬房有可能會變陣, 但我對錢厩睇法又有不同。呢個倉口兵源充足, 費很多功夫才攪好一匹好馬, 一定會乘馬匹健康狀態都好之時盡拚, 正切合了今期的主題「再向虎山行」。 不但如此, 還要尋虎穴, 得虎子。
評馬人:熊良錫
「夠響夠獎」2022年1月15日之賽事影片 | 
夠響夠獎(M096) 2022年1月28日之晨操相片 |
|
